Менскія ўлады афіцыйна забаранілі гурт Amaroka (дакумэнты+прэзэнтацыя сынглу!)
5223 / 3
29.05.2014

Менскія ўлады афіцыйна забаранілі гурт Amaroka (дакумэнты+прэзэнтацыя сынглу!)

У дзень сваёй афіцыйнай забароны ў Беларусі гурт Amaroka прэзэнтуе на Tuzin.fm свой новы сынгл «Pa vienach», які анансуе альбом «Virus».

Гэты адказ чыноўніцы ўвойдзе ў гісторыю, бо зьяўляецца першым афіцыйным пацьверджаньнем таго, што ў Беларусі існуе забарона на творчасьць шэрагу мясцовых рок-гуртоў. Amaroka рыхтавалася да прэзэнтацыі свайго новага альбому 5 чэрвеня. У адпаведнасьці з заканадаўствам былі пададзеныя адпаведныя дакумэнты ў Менгарвыканкам, але музыкам адмовілі. Прыватна тады намесьнік кіраўніка ідэалягічнага ўпраўленьня Сяргей Мядзьведзеў патлумачыў, што творчасьць гурта ўяўляе пагрозу нацыянальнай бясьпецы. Заяўнік і мэнэджар гурта Павал Белавус не задаволіўся такім адказам і падаў заяву яшчэ раз, гэтым разам з тэкстам песень, каб засьведчыць, што аніякага экстрымізму ды заклікаў да варажнечы ў іх творчасьці няма і блізка. Дакумэнт, пададзены ў выканкам, можна зірнуць па гэтай спасылцы.

Гэтым разам, Amaroka атрымала афіцыйнае тлумачэньне ад кіраўнічкі ўпраўленьня культуры Віталіны Рудзікавай. У ім вядзецца, што арганізатарам канцэрту гурта адмоўлена ў правядзеньні мерапрыемства, бо «зьмест твораў падпадае пад дзеяньне п. 5 разьдзелу 2 „Палажэньня аб арганізацыі і правядзеньні культурна-відовішчных мерапрыемстваў“». Паводле гэтага дакумэнту:

«Забараняюцца арганізацыя і правядзеньне мерапрыемстваў:

— якія маюць на мэце ажыцьцяўленьне прапаганды вайны або экстрэмісцкай дзейнасьці;

— якія прадстаўляюць пагрозу нацыянальнай бясьпецы, грамадзкаму парадку, маральнасьці і здароўю насельніцтва, правам і свабодам грамадзян;

— з парушэньнем патрабаваньняў гэтага Палажэньня і іншых актаў заканадаўства, у тым ліку ў сфэры аўтарскага права і сумежных правоў».

Па інфармацыі Tuzin.fm абурэньне ідэолягаў выклікаў выступ гурта на Майдане, а таксама ўдзел у канцэрце-акцыі «Салідарны зь Беларусьсю» разам з гуртом «Ляпіс Трубяцкі».

Лідэр каманды Зьміцер Афанасенка з гэтай нагоды не пераймаецца і нават у нечым удзячны пільнуючым органам — за тое, што паставілі ў шэраг з самымі паважанымі беларускімі выканаўцамі, якія таксама неаднойчы трапілі пад забарону. «Гэтыя гурты дакладна застануцца ў гісторыі і ў сэрцах іх прыхільнікаў, а чыноўнікі хутка зьнікнуць з пасадаў бязь сьледу і ніхто пра іх не згадае».

Каб суцешыць сваіх прыхільнікаў, гурт Amaroka вырашыў прадставіць на Tuzin.fm свой новы сынгл «Pa vienach». У сынгл увайшлі дзьве новыя песьні «Масты» і «Па венах», якія анансуюць новы канцэптуальны альбом гурта «Virus», што выйдзе ўжо ў сярэдзіне чэрвеня.

Удзельнікі каманды так тлумачаць канцэпцыю альбому і сынглу, які яго анансуе:

«Мы стараліся зрабіць канцэптуальны альбом і з дапамогай гэтага сынглу запускаем наш музычны «вірус». Можна ўжо пабачыць і вокладку будучага альбому, на якой чатырма сымбалямі перадаем з чаго складаецца «Virus»: нотка — кампанэнт „творчасьць“, сэрца — кампанэнт „каханьне“, Беларусь — кампанэнт „патрыятызм“, вусны — кампанэнт „пяшчота“. Гэтыя кампанэнты галоўныя ў творчасьці Amaroka і мы хочам, каб слухаючы нашыя песьні людзі падхоплівалі гэты вірус».

У межах прамоцыі альбому гурт плянуе выдаць новы альбом незвычайным вірусным спосабам, які пакуль трымае ў сакрэце, а таксама завітаць у Менгарвыканкам і падарыць яго ідэолягам.

Таксама Amaroka рыхтуецца да сэрыі летніх канцэртаў, праўда пакуль што не ў Беларусі, а толькі за мяжою.

Tuzin.fm

Спампаваць адным файлам на Tuzin.fm.

КАМЕНТАРЫ:

  • 12tuzin@gmail.com / адказаць
    29.05.2014 / 17:11

    У працяг тэмы:
    Хто такая Віталіна Рудзікава, якая забараніла гурт Amaroka?

    http://tuzin.fm/zhamerun/905/chto-takaja-vitalina-rudzikava-jakaja-zabaranila-hurt.html

  • Alexandra Fevra
    Alexandra Fevra / адказаць
    29.05.2014 / 17:21

    ім бы забараніць, а што - не гэтак і важна. я сумневаюся, што тэксты чыталі ўвогуле, хучтэй за ўсё проста, як пачулі гэты "роў дзікі", дык спужаліся.

  • Maximka Субоч
    Maximka Субоч / адказаць
    02.06.2014 / 22:46

    Первое заявление было под номером 1861. Надеюсь, второе (повторное) подано под номером 1863, чтобы придать знаковости моменту :)

  • КАМЕНТАВАЦЬ