У гіт-парад трапляюць альбомы беларускіх музыкаў, запісаныя ў апошні год. Агулам зьбіраецца 12 удзельнікаў туру - г.зв. тузін. Удзельнічаюць альбомы беларускамоўных (часткова беларускамоўных) выканаўцаў, а таксама канцэптуальныя складанкі песень, выдадзеныя за гэты час. З 2019 году разглядаюцца таксама міні-альбомы з 4-7 трэкаў, EP.
Кожны тур гіт-параду цягнецца каля трох месяцаў і адпавядае пары году (восень, зіма, вясна). Пасьля падвядзеньня вынікаў галасаваньня, чарт абнаўляецца цалкам, і галасаваньне пачынаецца спачатку. Улетку праводзіцца мэгатур па вызначэньню найлепшага альбому, у якім удзельнічаюць усе рэлізы сэзону.
Права прыняцьця канчатковага рашэньня аб уключэньні або неўключэньні ў гіт-парад альбомаў на TuzinFM рэдакцыя парталу пакідае за сабой.
Галоўнае патрабаваньне да ўдзельнікаў гіт-параду ды іх прыхільнікаў весьці шчырую барацьбу. Галасаваць можна зарэгістраваным на сайце карыстальнікам, а таксама зайшоўшы ў свой акаўнт ў сацыяльнай сетцы (Facebook, УКантакце) адзін раз на суткі, абіраючы адзін, два або тры альбомы.
Першы
У альбомным чарце на TuzinFM бярэ ўдзел альбом «Першы», а на самой справе 16-ы студыйны дыск гурту Neuro Dubel.
Брешь
Дуэт MorkvoЦвет прэзэнтуе ў новым туры альбомнага чарту на TuzinFM сваю дэбютную працу «Брешь», у якую ўвайшлі найлепшыя беларуска- і расейскамоўныя творы.
Дарогі
Лідэр гурту Vuraj Сяргей Доўгушаў і баяніст Алесь Ясінскі прэзэнтуюць на TuzinFM сумесны альбом «Дарогі» на словы Анатоля Сыса і Ўладзімера Караткевіча, які быў запісаны ў Празе.
Hod za hodam
Сьпявачка і паэтка Лета пры падтрымцы Лявона Вольскага прэзэнтуе на TuzinFM свой дэбютны альбом «Год за годам».
Turriptosis Nutricula
Матэрыял для альбому «Turriptosis Nutricula» зьбіраўся 16 гадоў. Дыск стаў дэбютным у дыскаграфіі беларускамоўнага калектыву зь Беластоку і разам з тым разьвітальным.
Wild
У сваім трэцім студыйным альбоме гурт Irdorath, які быў выдадзены на нямецкім лэйбле Foxy Records, паказвае дзікі бок сваёй творчасьці.
Казка
Маладая сьпявачка Адэля Вольская прэзэнтуе на TuzinFM першую паўнавартасную працу «Казка», у якой распавядае гісторыю свайго жыцьця — ад падлеткавага ўзросту да сёньня.
Kalasy Pad Siarpom
Мэтал-гурт Hok-key выдаў у Нямеччыне новы альбом «Kalasy Pad Siarpom» у стварэньні якога ўзялі ўдзел музыкі з гуртоў Irdorath і ByCry, а таксама вакаліст з харавой капэлы БДУ і бэк-вакалістка Scorpions.
Всё будет гут
Хасыдзка-беларускі выканаўца прэзэнтуе ў альбомным чарце на TuzinFM cвой дэбютны альбом «Усё будзе гут», у якім сярод іншага ўзялі ўдзел Аляксандар Памідораў і намінант на «Грэмі-2016» Tony Fadd.
Апошні
Гурт, які стварылі шоўмэн ды журналіст разам з дырэктарам «Графіці», сабраў на свой дэбютны альбом песьні, напісаныя цягам амаль 20 гадоў, і даў назву дыску «Апошні».
Кароткая гісторыя Беларусі
Алесь Дзянісаў прадстаўляе ў альбомным чарце на TuzinFM сваю працу «Кароткая гісторыя Беларусі», прэзэнтацыю якой у Менску афіцыйна забаранілі.
Мая краіна
Трэш-блюзавы бэнд зь Менску выдаў другі нумарны альбом «Мая краіна», у якім зрабіў спробу асэнсаваць сябе і сваё месца ў прасторы.