Новы iPhone
3310 / 0
17.02.2015

ZnaROCK. Апрабавана на Onliner.by (аўдыё)

У новым туры аўдыёчарту на Tuzin.fm гурт ZnaROCK прадстаўляе песьню «Новы iPhone», якая была прайшла выпрабаваньне на форуме Onliner.by. Музыкам ужо дасталося за каньюнктуршчыну, клаўнаду і нават гомасэксуалізм.

На самой справе, новы твор у лідэра ZnaROCK Яўгена Сокалава нарадзіўся зь любові да творчасьці Андрэя Макарэвіча. У дзяцінстве, больш за 20 гадоў таму, будучы музыка пачуў яго песьню пра відэамагнітафон — гэта быў першы твор, які яму сьвядома спадабаўся. І вось летась ён напісаў сваеасаблівы адказ на яго. «Калі я ізноў зьвярнуўся да той песьні дзяцінства, то быў зьдзіўлены, наколькі мала што зьмянілася ў стаўленьні людзей да найноўшых дэвайсаў і гаджэтаў за 30 гадоў. Так і нарадзіўся новы тэкст. І ўжо толькі пасьля, калі пайшла шуміха вакол выхаду чарговай мадэлі смартфона, мы вырашылі яе апэратыўна зрабіць і запісаць. Адпаведна і прэзэнтавалі на самым папулярным партале, прысьвечаным лічбавай тэхніцы», — распавядае Яўген. Пасьля прэзэнтацыі на onliner.by ён шмат чаго новага даведаўся пра сябе і сваю творчасьць з камэнтароў, якімі славіцца гэты партал. «Усё было ў найлепшых традыцыях беларускіх форумаў. Нас звінавацілі ў каньюнктуршчыне, клаўнадзе, гомасэксуалізме ды іншым. Асабіста мы лічым, што праграма-мінімум была выканана яшчэ на этапе запісу: песьня цудоўна падняла настрой гукарэжысэру Паўлу Яноўскаму», — сьмяецца лідэр ZnaROCK і спадзяецца, што аўдыторыя парталу Tuzin.fm адэкватна зразумее яго творчую задуму.

ZnaROCK вядомы наведнікам Tuzin.fm зь песьні «Я эма, мама», якая ў сэзоне 2010—2011 увайшла ў лік 12 галоўных песень. Нядаўна музыкі абнавілі склад гурта, адмовіліся ад скрыпкі ды ўсяго смычкова-ска-панкавага канцэпту і больш схіліліся да рок-гучаньня. Пошукі гуку і стылю працягваюцца. Бліжэй да лета-2015 гурт абяцае канчаткова вызначыцца, а пакуль зьбіраецца даваць чаду і хуліганіць на сваіх канцэртах. За навінамі каманды можна сачыць празь іх афіцыйную суполку.

ZnaROCK — Новы iPhone (музыка і словы гурта). Зьмяшчаецца са згоды выканаўцы.

Tuzin.fm

Колькасьць дэвайсаў

Нібыта курс баксу

Расьце, хрэн набудзеш іх усе

Я жыў, сьпяваў песьні

Нокію 3310 меў

І думаў, што я ўсіх круцей

Але мая дзеўка

Сказала мне: «Жэнька,

Ты выглядаеш лахом»

 

І ўратуе адно:

Мне і ёй заадно

Набыць тэрмінова айфон

 

І я набыў сабе новы iPhone —

Гэта ай-асалода, ай-цуд і ай-сон!

Яго слухаць можна, можна чытаць,

А калі трэба — нават паразмаўляць!

 

Па кроплі зарплату

ў даўгую шуфляду

Я вырашыў не адкладаць

Пайшоў у банк ля хаты

Крэдыт узяў і дату

Рэлізу пачаў я чакаць

Паглядзеў усе відосы

Пра Стыва Джобса

Сяброўка зрабіла аванс

У чарзе суткі стаяў,

Але ж сука прыдбаў

Такі запаветны дэвайс!

 

Рэфрэн

 

Прайшлі па гардкоры

Два тыдні ў ап-сторы

Ня знаю, як жыў я раней

Бяз гэтых праграмак:

iTunes, Instagram-у,

«Angry Birds» і гэтак далей

 

Ні чыпсаў, ні піва

І кеды ўсе ў дзірах

Інэт адрубілі даўно

Але тру пантовае

Рознакаляровае

Куленепрабівальнае шкло!

 

Рэфрэн.

 

Няшмат прайшло часу,

Зь дзяўчынай расстаўся,

Крэдыт мне плаціць гады тры

Я зранку прачнуўся

Залез у фрэнд-стужку

І ах…еў ад навіны:

Кампанія Apple

Выпусьціць гэтым летам

Новы самы клёвы смартфон!

У ім будзе праектар,

Відэлец і блэндар

Ну як мне пражыць безь яго.

Рэфрэн