Я хацеў бы спаткацца з Вамі на вуліцы
1890 / 0
28.02.2019

Песьня, у якой — Космас. Прэм’ера ад «Цмокаў» (аўдыё/відэа)

Гурт «Цмокі» прэзэнтуе на TuzinFM сваю новую песьню, якая напісаная на верш Максіма Багдановіча «Я хацеў бы спаткацца з Вамі на вуліцы».

«Цмокі» прэзэнтуюць новы твор з хваляваньнем, бо яны ўзяліся пакласьці на музыку славуты твор Максіма Багдановіча. Паэт напісаў яго ў 1915 годзе. «Гэта свабодны верш, які вельмі лёгка кладзецца на музыку, таму што ў ім — Космас. Спадзяемся, што адчуваньне гэтага Космасу мы перадалі і ў нашай песьні», — кажа вакаліст гурта Мікола Шакель.

На новую песьню музыкі таксама прэзэнтаваны відэашэраг, які складаецца з касьмічных здымкаў беларускага астранома Віктара Малышчыца. Відэа дапамаглі зрабіць Ала Шарко і Пятро Слуцкі.

«Я хацеў бы спаткацца з Вамі на вуліцы» — другі твор, які запісалі «Цмокі» пасьля 10-гадовай паўзы ў дзейнасьці. Летась у чарце на «Тузіне» браў удзел іх кампазыцыя «Іван і Бог».

Цмокі — Я хацеў бы спаткацца з Вамі на вуліцы (музыка гурта, словы Максіма Багдановіча)

TuzinFM, фота Віктара Малышчыца

Я хацеў бы спаткацца з Вамі на вуліцы

У ціхую сінюю ноч

I сказаць:

«Бачыце гэтыя буйныя зоркі,

Ясныя зоркі Геркулеса?

Да іх ляціць нашае сонца,

I нясецца за сонцам зямля.

 

Хто мы такія?

Толькі падарожныя, — папутнікі сярод нябёс.

Нашто ж на зямлі

Сваркі і звадкі, боль і горыч,

Калі ўсе мы разам ляцім

Калі ўсе мы разам ляцім

Да зор?»

 

Я хацеў бы спаткацца з Вамі на вуліцы

Я хацеў бы спаткацца з Вамі на вуліцы

Я хацеў бы спаткацца з Вамі на вуліцы

Я хацеў бы спаткацца з Вамі на вуліцы