Хадзіла галота
12484 / 1
20.09.2016

Новы кліп Re1ikt. Беларускае фэнтэзі ў лесе пад Бабруйскам (прэм’ера!)

Сваё відэаўвасабленьне атрымала песьня «Хадзіла галота» з альбома «Лекавыя травы». Кліп зьнялі прыхільнікі каманды, музыкі ўпадабалі відэа і прызналі за афіцыйнае.

Кліп распавядае трагічную гісторыю каханьня ў стылі фэнтэзі зь нечаканым фіналам, якая разгортваецца ў зачараваным лесе недалёка ад Бабруйску ды ў іншых таямнічых мясьцінах. Аўтаркай сцэнару і рэжысэркай кліпу выступіла выкладчыца курсаў «Мова нанова» ў Бабруйску Алеся Лацінская. Галоўныя ролі выканалі віялянчэлістка гурта Vodar Ганна Лукашык, гісторык Зьміцер Шапялевіч ды краязнаўца Яўген Лісоўскі, які, дарэчы, неаднаразова здымаўся ў ваенна-гістарычных фільмах. Што тычыцца сюжэту, дык аўтары імкнуліся ня проста кіравацца тэкстам, але напісалі сваю гісторыю.

«Хапіла загадкавых вобразаў і містычнай мэлёдыі, каб імгненна склалася гісторыя, хоць паміж намі было шмат дыскусіяў наконт тэксту, бо кожны разумеў яго па-свойму, і не адзін вечар абмяркоўвалі, хто што рабіў, хто такая Галота, хто быў зяць, а хто star з барадой», — тлумачыць рэжысэрка. «Ёсьць песьні, якія пачынаеш разумець пасьля другога-пятага праслухоўваньня, а гэтая стрэліла адразу ў сэрца. Для мяне яна — сымбаль багатага Космасу беларусаў. Маю на ўвазе і тых аўтараў зь мінулага, якія прыдумалі песьню, і сучасных, якія далі ёй новае жыцьцё», — прызнаецца апэратар Сяржук Лацінскі.

Праца над відэа цягнулася некалькі месяцаў, і, як прызнаюцца яго стваральнікі, цяжэй за ўсё было злучыць зьняты матэрыял у цэльны твор. Асаблівая ўвага надавалася касьцюмам і дэкарацыям, якія стварыла дызайнэрка Дар’я Шапялевіч. Прыкладам, толькі вялізная маска бога ажно мэтар даўжынёй выраблялася два тыдні. Урэшце рэшт, вынікам засталіся задаволеныя і здымачная група, і музыкі, якія ў працэс здымак аніяк ня ўмешваліся.

«Хоць відэа стварылі аматары, усё ж мы ня лічым яго фан-артам, але самастойным творам мастацтва, які зьявіўся як працяг нашай музычнай ідэі», — кажа лідэр гурта Re1ikt бубнач Аляксандар Дземідзенка.

У аснову кампазыцыі «Хадзіла галота» пакладзеная запісаная ад носьбітаў у Лельчыцкім раёне беларуская народная песьня. Гэты трэк з альбома «Лекавыя травы» найбольш палюбіўся слухачам, ён адметны тым, што апроч звыклых рок-інструмэнтаў тут можна пачуць ірляндзкі тын-вістл.

Прэзэнтаваць кліп публіцы музыкі мяркуюць на сваім найбліжэйшым канцэрце 25 верасьня ў менскім TNT Rock Club.

Re1ikt — Хадзіла галота (рэжысэр — Алеся Лацінская). Зьмяшчаецца са згоды выканаўцы.

Tuzin.fm

КАМЕНТАРЫ:

  • Serhio / адказаць
    13.10.2016 / 10:13

    Песня хорошая- советую посмотреть открытие тоннеля в швейцарских Альпах на ютюбе и обратить внимание на образы - пригодятся для следующего видео.

  • КАМЕНТАВАЦЬ