Канцэрт WZ-orkiestra 6 лютага пад пагрозай зрыву (заява арганізатараў)
3395 / 2
02.02.2015

Канцэрт WZ-orkiestra 6 лютага пад пагрозай зрыву (заява арганізатараў)

Маючы ўсе дазволы-дамовы на руках і практычна прададзеную залю, арганізатары канцэрту WZ-orkiestra апынуліся ў вельмі дзіўнай сытуацыі. Клюб «Піраты» ня хоча праводзіць гэтае мерапрыемства.

Сябры! З свайго боку мы зрабілі ўсё магчымае, каб канцэрт WZ-orkiestra адбыўся ў прызначаны дзень, у прызначаны час і ў прызначаным месцы. На правядзеньне дадзенага канцэрту было атрыманае гастрольнае пасьведчаньне №50 ад 14.01.2015 ад галоўнага ўпраўленьня ідэалягічнай работы, культуры і па справах моладзі Менгарвыканкаму. З клюбам «Піраты» — ТАА «Арт Арміс» — была заключаная дамова аказаньня паслугаў ад 5.01.2015 (далей — Дамова). Пасьля атрыманьня гастрольнага пасьведчаньня была распачатая рэклямная кампанія і рэалізацыя квіткоў праз апэратара Kvitki.by.

Увечары ў чацьвер 29 студзеня, калі большая частка квіткоў ужо была прададзеная, клюб «Піраты» ў вуснай форме паведаміў, што ня можа выканаць узятыя на сябе абавязкі па дамове і правесьці канцэрт у сувязі з тым, што ў клюбе была адключаная электрычнасьць за запазычынасць па аплаце, а лічыльнікі апячатаныя. Са словаў дырэктара клюбу Анатоля Данільчанкі, ён быў вымушаны прыпыніць працу «Піратаў» на нявызначаны тэрмін, распусьціць пэрсанал і адмяніць усе найбліжэйшыя заплянаваныя мерапрыемствы. Пры гэтым пісьмовае паведамленьне з тлумачэньнем прычынаў адмовы ў аказаньні паслугаў, як тое абавязвае зрабіць Дамова, не было дасланае. Больш за тое, апынулася, што іншыя заплянаваныя мерапрыемствы клюб «Піраты» мае намер праводзіць — 7 лютага там мае адбыцца рэгі-фэстываль, а 15 лютага — канцэрт групы «Кукрыніксы».

У сувязі са згаданымі фактамі, у нас ёсьць падставы сумнявацца, што клюб сапраўды ня можа выканаць узятых на сябе абавязкаў у правядзеньні канцэрту WZ-orkiestra. У нас няма аніякіх фактычных падставаў спыняць продаж квіткоў на мерапрыемства. Маючы на руках усе неабходныя дакумэнты, мы ў праве патрабаваць зладзіць канцэрт так, як і было заплянавана. Для нас яго правядзеньне ў заплянаваны час надзвычай важна. Мы хочам адстаяць гонар і сумленьне. Свой, як арганізатараў. Музыкантаў на чале са Зьмітром Вайцюшкевічам, якія пастаянна сутыкаюцца з адменамі канцэртаў у Беларусі. І ўсёй беларускай культуры, бо гэты гурт выконвае песьні на словы найлепшых беларускіх паэтаў. Выказваем шчыры дзякуй тым гледачам, якія ўжо набылі квіткі і аказалі свой давер нам і музыкам.

На нашу думку, ніхто не павінен быць зацікаўлены ў зрыве гэтага мерапрыемства. У выпадку яго неправядзеньня фінансавыя страты панясуць, як арганізатары, так і музыканты і клюб, а гледачы не пачуюць адмысловай праграмы, якую WZ-orkiestra падрыхтаваў да гэтага вечару. Да ўсяго, адмена гэтага канцэрту нэгатыўным чынам адаб’ецца на рэпутацыі канцэртнай пляцоўкі і на рэпутацыі дзяржаўных органаў і палітыкі ў галіне культуры.

Мы вядзем далейшыя перамовы ў спадзеве, што ўсё вырашыцца станоўча. Будзем паведамляць пра зрухі ў гэтай справе на партале Tuzin.fm, а таксама праз інтэрнэт-СМІ.

Просьба да гледачоў, якія ўжо маюць квіткі на канцэрт 6 лютага, не хвалявацца і пакуль іх не здаваць.

Cпадзяемся на Вашае разуменьне!

Каманда парталу Tuzin.fm

КАМЕНТАРЫ:

  • Леон Зильберман
    Леон Зильберман / адказаць
    05.02.2015 / 05:57

    Добрый день, так концерт состоится или нет?

  • 12tuzin@gmail.com / адказаць
    05.02.2015 / 18:21

    Добры дзень! Мы робім пакуль усё магчымае, каб ён адбыўся. Не пазьней за 12.00 заўтрашняга дня паведамім пра канчатковы стан справаў тут, на "Тузіне" і ў нашых суполках у соцсетках. Сачыце за навінамі!

  • КАМЕНТАВАЦЬ