!OUT: Першы беларускі ганг-альбом ад Івана Крываноса (аўдыё/відэа)
2635 / 0
28.11.2015

!OUT: Першы беларускі ганг-альбом ад Івана Крываноса (аўдыё/відэа)

Лідэр праекту Hangmeleon запісаў першы альбом у Беларусі, заснаваны на гучаньні ганг-драма.

«Нулявыя» гады ў Беларусі сталіся эрай джамбэяў ды дарбукаў — па іх ня ляпаў хіба толькі лянотнік. А цяпер прыйшла эра ганг-драмаў. Новавынайдзены інструмэнт зьнешне нагадвае НЛА — дзьве злучаныя між сабой паўсфэры зь ямачкамі. І вось прысьпеў час, каб выдаць першы ў Беларусі альбом з кампазыцыямі для ганг-драма. На тое наважыўся лідэр праекту Hangmeleon Іван Крыванос.

ТГ: Іван, калі ты займеў свой першы ганг-драм?

Іван: Я дакладна памятаю гэты дзень. Ганг зьявіўся ў мяне 20 сьнежня 2014 году. І я адразу прыдумаў кампазыцыю «Палёт». Яна й стала загалоўнай на першым альбоме.

ТГ: Чаму абраў менавіта гэты экзатычны інструмэнт?

Іван: Мне сябар пазамінулым летам паказаў кліп, дзе хлопец грае ў тунэлі на такім інструмэнце, і я папросту ў яго адразу ўлюбіўся. У інструмэнт, канечне. Далей пачаў шукаць, дзе ды як яго набыць. Высьветлілася, што ганг перасталі выпускаць напрыканцы 2013 году. Тым ня менш, мне вельмі пашэньціла, што ганг зьявіўся ў мяне ды ў цэлым па ўсёй краіне.

ТГ: Ганг цяпер мае ўсялякія разнавідцасьці — хэпі-драм, гэндпан, «Сыбірыя»…

Іван: Таму што ганг было цяжка купіць, сталі зьяўляцца майстры, якія пачалі вырабляць аналягі. Цяпер такіх майстэрняў прыкладна 60.

ТГ: Ці мае ганг-драм нейкія мінусы ў параўнаньні зь іншымі інструмэнтамі?

Іван: Па-першае, ганг-драм разладжваецца, наладжваць яго трэба ў іншай краіне, а гэта дорага. Па-другое, інструмэнт падвяргаецца карозіі, таму патрэбны адмысловы дагляд. Па-трэцяе, гэты інструмэнт робяць у адной танальнасьці, 8—10 нотаў, таму кампазыцыі становяцца падобнымі адна да адной.

ТГ: Колькі ў цябе ўжо аўтарскіх рэчаў?

Іван: Каля дзясятку. Кампанаваньне твораў ускладняецца тым, што музыка для мяне — гэта хобі, якое ўжо перарастае ў нешта большае. Ганг зь першага дня ўвайшоў у маю сям’ю. Аднак акром хобі, ёсьць і праца — 8 гадзінаў у дзень, як звычайна ўва ўсіх людзей. Акром таго, у мяне жонка й трое дзяцей. Малодшаму нядаўна месяц споўніўся.

ТГ: Віншую! А твой праект Hangmeleon — гэта ты адзін ці могуць далучацца й іншыя людзі? 

Іван: Гэта адзін чалавек. Але цяпер я супрацоўнічаю зь Дзянісам Давыдавым, і ён па-іншаму зірнуў на мае кампазыцыі. Дзякуючы ягонаму погляду, зьяўляецца й другі альбом з музыкай, якую можна будзе слухаць у аўто, дома, у месцах, дзе ня трэба паглыбляцца ў мэдытацыю.

ТГ: Адначасова ты ўдзельнічаеш у іншых праектах, у тым ліку тэатральных.

Іван: Так. Гэта й «Музычная гарбата», і ёга выходнага дня, і школа навучаньня граньню на кахоне «Дон Кахон». Таксама ў найбліжэйшы час вазьму трох вучняў ды буду вучыць іх граць на гангу.

ТГ: Якое самае незвычайнае месца, дзе табе давялося граць?

Іван: Дзіцячая пляцоўка. Не, жартую. Канечне, незабыўна было граць, седзячы ў байдарцы пасярод возера Вяча на заходзе Сонца перад самай Поўняй.

Прэзэнтацыя першага беларускага ганг-альбома адбудзецца 5 сьнежня ў Dance Cafe, што на вул. Куйбышава, 22 у Менску. Падрабязнасьці на старонках праекту Hangmeleon УК/FB.

Віктар Сямашка, Tuzin.fm