Pauline бярэ ў «Палон» (аўдыё)
Сьпявачка Pauline прадстаўляе ў новым туры аўдыёчарту на Tuzin.fm сваю новую песьню «Палон» — вынік сумеснай працы з гітарыстам і аранжыроўшчыкам Раманам Саракалетавым.
У адрозьненьне ад ранейшых сваіх песень новы твор Паліна Цімохіна напісала не сама. «Палон» ёй прапанаваў да выкананьня гітарыст і аранжыроўшчык Раман Саракалетаў, які працаваў са шматлікімі беларускімі музыкамі (Лермонт, Vinsent, Паліна Рэспубліка, Hurma). «Мы былі знаёмыя з Раманам, але ўсё адно яго прапанова апынулася для мяне сапраўдным сюрпрызам, — распавядае Pauline. — Калі я паслухала дэма, зразумела: трэба браць! Тым больш для мяне ніколі ніхто не пісаў песень, усё што я сьпяваю і сьпявала — мае ўласныя творы».
Сам аўтар быў пэўны ад пачатку — ягоны твор надзвычай пасуе Паліне. «Песьня нарадзілася спантанна і адразу ў гатовым выглядзе. Безумоўна яна пра каханьне, але ня трэба разглядаць яе ў вузкім разрэзе каханьня паміж мужчынам і жанчынай. „Палон“ — гэта песьня пра любоў да момантаў, пра каханьне без умоваў», — кажа Раман.
Зьвядзеньнем і майстарынгам песьні займаўся Андрэй Акатаў, а вокладку да самотніку «Палон» намалявала Натальля Мармалюк.
Pauline — Палон (музыка і словы Рамана Саракалетава). Зьмяшчаецца са згоды выканаўцы.
Tuzin.fm
Не, не кажы, што больш не сустрэнемся.
Колерам белым, у цёплым адзеньні
Адказы шукаю ў абдымках санлівых,
Дамоў…
Так, да сустрэчы, убачымся ўвечары.
Подых зімовы кранае за плечы.
Чаканьне сяброўкай бясконца вядзе за сабой.
Заспакой мяне шчырымі словамі, сэрца ў далонь.
Птушкай падаю, падаю, падаю я ў палон.
Падаю, падаю, падаю я ў палон.
Так, незалежна ад усіх, закаханая,
Словы цішэй пад блакітнымі хвалямі,
Сэрца глыбей адчувае — ты побач са мной.
Пальцы ў цёплы пясок, усхваляваная.
Любы мой, крыламі ты ахінай мяне.
Думкі паветраным шарам бліжэй да цябе.
Прытулі мяне як у апошні,
Усё гэта сон…
Толькі падаю, падаю, падаю я ў палон…
Падаю, падаю, падаю я ў палон…
Падаю, падаю, падаю я ў палон…
Падаю, падаю, падаю я ў палон…
КАМЕНТАВАЦЬ