Трагічная перамога над страхам. «Закон Гука» зрабілі песьняю верш Ластоўскага (прэм’ера)

Гурт «Закон Гука» прэзэнтуе ў дадатку да праекту «(Не)расстраляная паэзія» песьню на словы Вацлава Ластоўскага «Пішы».

Вацлаў Ластоўскі пасьпеў зрабіць надзвычай шмат. Ён аўтар важных працаў — «Кароткая гісторыя Беларусі», «Расійска-крыўскага (беларускі) слоўніка» і «Гісторыі беларускай (крыўскай) кнігі», першай беларускай фантастычнай аповесьці «Лябірынты» ды іншага. Яму прысьвячаў вершы Янка Купала, а яго пісьменьніцкі талент адзначаў Максім Багдановіч, які пісаў, што кожную ягоную рэч можна лічыць за ўзор пісьменства. Ластоўскі адстойваў права беларусаў на стварэньне самастойнай дзяржавы, у БНР ён ачольваў кабінэт міністраў. У савецкай Беларусі ён кіраваў Беларускім дзяржаўным музэем, быў сакратаром Акадэміі навук, зладзіў экспэдыцыю, дзякуючы якой быў знойдзены Крыж Эўфрасіньні Полацкай. Багата пераклаў на беларускую мову, у тым ліку творы Кіплінга, Ажэшкі, Андэрсана. На ўзьлёце ягоная творчая і навуковая дзейнасьць была абарваная. Яго арыштавалі ў 1930 годзе, трымалі ў турмах Менску і Масквы, выслалі на 5 гадоў у Саратаў, дзе арыштавалі паўторна і расстралялі. Налета 23 студзеня будзе 80 гадоў з даты сьмерці Власта, як яго звалі сучасьнікі.

Вацлаў Ластоўскі

Менскі рок-гурт «Закон Гука» ўшанаваў памяць Ластоўскага песьняй на ягоны верш «Пішы». «На жаль, у школе не расказваюць гісторыі рэпрэсаваных беларускіх дзеячаў. І мы вельмі мала ведаем пра той час і тых асобаў. Але тым больш каштоўныя яны і іх спадчына для нас цяпер, у час, калі ідзе актыўнае фармаваньне нацыі», — кажа вакаліст каманды Лёкса Кузьмін. Ён кажа, што верш «Пішы» ўразіў сваёй энэргетыкай і сучасным гучаньнем. Музыкі стараліся максымальна раскрыць зьмест твору і дапоўніць яго музыкай, каб музычны і паэтычны складнік гучалі разам, як адзінае.

Гурт «Закон Гука»

«Мы прадстаўляем сваё бачаньне верша „Пішы“. Гэта трагічная перамога над страхам. Страхам быць непачутым, страхам таго, што думкі ня будуць напісаныя, а тое што напісана — ніколі ня будзе прачытана і не кране сэрца. Цяпер гэтага страху няма, бо ёсьць песьня. Ведаем, што рукапісы не гараць, але ў сучасных умовах гэтага недастаткова. Трэба каб словы сьпяваліся, толькі тады можна быць пачутым», — кажуць музыкі з «Закону Гука».

Песьня «Пішы» завяршае праект «(Не)расстраляная паэзія», які ініцыяваў сёлета партал TuzinFM. У яго межах прайшлі лекцыі, прысьвечаныя расстраляным у 1937 годзе паэтам, а беларускія музыкі стварылі песьні на іх вершы. Першы тур у сэзоне 2017/2018 складаўся з гэтых кампазыцыяў. Акром 12 песень, якія сталі асноваю праекту, у музычным дадатку таксама былі прэзэнтаваныя песьні «Восень» на словы Цішкі Гартнага ад праекту N.O.I.R./Stern, «Вятры» на словы Сяргея Астрэйкі гурту Zanzibar, «У гэту ноч» на словы Сяргея Фаміна ад гурту Whiskey Way і гэты твор гурту «Закон Гука» на словы Вацлава Ластоўскага.