Ой, над ракою
4325 / 0
21.02.2019

Znich & Rutvica: «Так беларускі фольк яшчэ не гучаў!» (прэм’ера)

Гурты Znich і Rutvica прэзэнтуюць на TuzinFM свой сумесны сынгл «Ой, над ракою». Алесь Таболіч называе гэтую працу надзвычай важнай, бо ў ёй знойдзенае новае гучаньне беларускага фольк-мэталу.

Сынгл «Ой, над ракою» ўнікальны зь дзьвюх прычынаў, тлумачыць Алесь Таболіч. «Па-першае, мы зьмянілі стылістыку, спалучыўшы блэк-мэтал з народным сьпевам. Так беларускі фальклёр яшчэ не гучаў!» — кажа ў камэнтары TuzinFM лідэр Znich. Стыль новай песьні акрэсьліваецца, як «архаічны фольк-мэтал». «Другая прычына, які робіць гэты трэк унікальным — гэта аўтэнтычны сакральны абрадавы сьпеў. „Рутвіца“ выконвае яго менавіта ў той жа манеры і танальнасьці, як ён пяяўся ў вёсцы», — кажа Алесь. Дагэтуль у «Зьніча» быў у рэпэртуары адзін абрадавы сьпеў — «Ой, дымна за дваром», але ён быў пададзены ва ўласнай музычнай інтэрпрэтацыі. У аснову «Ой, над ракою» пакладзена арыгінальная народная мэлёдыя.

«Ой, над ракою» — калядны зімовы сьпеў. Ён быў запісаны ў вёсцы Малыя Гарадзяцічы, што ў Любанскім раёне на Меншчыне. У стварэньні трэку ўзяў удзел Erebor з гурта Krumkac, які стварыў музыку і запісаў гітары, а Дар’я Зуева (Rutvica) запісала партыю скрыпкі. Трэк быў запісаны на Digivision Records. Фота і дызайн вокладкі зрабіў Міхаіл Аракчэеў.

Znich Rutvica — Ой, над ракою (словы народныя, музыка Erebor)

 TuzinFM

Ой, над ракою, над глыбокаю

Сьвяты вечар, над глыбокаю

Там стаіць явор, тонкі-высокі.

Сьвяты вечар, тонкі-высокі.

 

Тонкі-высокі, уверсе кудравой.

Сьвяты вечар, уверсе кудравой

На том кудравом сівы арол сядзіць.

Сьвяты вечар, сівы арол сядзіць

 

Сівы арол сядзіць, усё ў ваду глядзіць.

Усё ў ваду глядзіць — шчуку-рыбу бачыць.

«Ой, шчучка-шчучка, як ты глыбока.

Як ты глыбока — так я высока»

 

Сівы арол сядзіць, усё ў ваду глядзіць.

Сьвяты вечар, усё ў ваду глядзіць.

Усё ў ваду глядзіць — шчуку-рыбу бачыць.

Сьвяты вечар, шчуку-рыбу бачыць

 

«Ой, шчука-шчука, як ты глыбока.

Сьвяты вечар, як ты глыбока

Як ты глыбока — так я высока

Сьвяты вечар, так я высока

Ой, шчука-шчука, пасватаймося

Сьвяты вечар, пасватаймося,

Пасватаймося, пабратаймося

Сьвяты вечар, пабратаймося».

 

«Ой, зь цябе, шчучка, луску скрабаюць,

А зь мяне, арла, пере скубаюць.

Ой, зь цябе, шчучка, смачна вячэра

А зь мяне, арла, мякка пасьцеля.

 

Ой, зь цябе, шчучка, смачная юшка

А зь мяне, арла, мякка падушка

3 тваіх костачак зробім масточак,

З майго перайка зробім вяночак».