Freemuse Award: «Песьні Вольскага ёсьць гімнамі для тых, хто марыць пра свабодную Беларусь»
1553 / 0
25.04.2016

Freemuse Award: «Песьні Вольскага ёсьць гімнамі для тых, хто марыць пра свабодную Беларусь»

Лявон Вольскі стаў першым беларусам, які атрымаў міжнародную прэмію, якая ўручаецца музыкам ды арганізацыям, якія спрыяюць свабодзе творчага выказваньня.

Freemuse Award беларускаму рок-музыку прысудзіла незалежная міжнародная арганізацыя Freemuse, якая адстойвае свабоду выказваньня музыкаў і кампазытараў ва ўсім сьвеце. Выканаўчы дырэктар прэміі Оле Рэйтоў зазначыў, што Лявон Вольскі «працягвае даўнюю традыцыю музыкаў з актыўнай грамадзянскай пазыцыяй, якія ў сваёй творчасьці зьвяртаюць увагу на істотныя сацыяльныя і палітычныя пытаньні і становяцца сымбалем руху за грамадзянскія правы, выказваючы праз сваю музыку расчараваньне і надзею». У афіцыйным паведамленьні зазначаецца, што беларускі сьпявак шмат гадоў знаходзіцца ў сумнавядомым «чорным сьпісе», а яго песьні зьяўляюцца гімнамі для тых, хто марыць пра дэмакратычную і свабодную Беларусь. Афіцыйная цырымонія ўручэньня прэміі мае адбыцца ў Стакгольме, у нядзелю 8 траўня 2016 году.

Лявон Вольскі заявіў у сваю чаргу, што для яго вялікі гонар атрымаць Freemuse Award і зазначыў, што гэтая ўзнагарода належыць усім тым, хто падтрымлівае яго як на Радзіме, так і ў іншых краінах сьвету. «З дапамогай музыкі я распавядаю за што люблю Беларусь, і пра тое, што мяне ў ёй непакоіць. Базісам творчасьці зьяўляецца свабода ў найчысьцейшай форме. Без свабоды няма музыкі і няма праўды — няма праўды ў музыцы», — падкрэсьліў музыка. Музыка прысьвяціў узнагароду сваёй жонцы і прадусарцы Ганьне Вольскай, якая нядаўна пайшла ў іншы сьвет.

Freemuse Award уручаецца за «выдатную працу на карысьць свабоды музычнага выказваньня». Першым узнагароду атрымаў у 2008 годзе рэгі-сьпявак з Кот-д’Івуару Тыкэн Джа Факолі, якога фактычна выслалі з роднай краіны і пагражалі расправаю за песьні з крытыкаю ўладаў. Freemuse Award таксама атрымлівалі Рамі Эсам — музыка з Эгіпту, якога назвалі «сьпеваком рэвалюцыі», падчас падзеяў у Каіры ў 2011 годзе яго жорстка зьбілі пры разгоне акцыі; курдзкі музыка Фэрхат Тунч, якога за яго творчасьць прысудзілі да месячнага турэмнага зьняволеньня, а таксама Піт Сыгер, знакаміты амэрыканскі фольк-сьпявак ды грамадзкі актывіст.

Tuzin.fm