1913 / 0
02.04.2014

Віктар Сямашка апярэдзіў The UNB па колькасьці альбомаў (аўдыё)

Новы альбом «Зьнянацку» стаў для Віктара Сямашкі 108-м па ліку.

У такім стылі, як Віктар Сямашка, у Беларусі ня грае бадай ніхто. У ягоных п’есах перасякаюцца фры-джаз, акадэмічная музыка, электроніка, фальклёр і яшчэ безьліч усяго. Яго новы альбом «Зьнянацку» поўніцца незвычайнымі інструмэнтальнымі спалучэньнямі. Напрыклад, адначасова гучаць тры сынтэзатары, у тым ліку аналягавы і кішэнны, а таксама афрыканскі драўляны ксыляфон і тыбэцкая чара ды шмат розных духавых інструмэнтаў. Акрамя самога Сямашкі ў працы над рэлізам узялі ўдзел Ігар Адасік, Раман Яраш, Васіль Панкратаў, гурт Masque Noir у поўным складзе. Запіс дыску адбыўся летась у менскім раёне Грушаўцы, у хатцы, што завецца ДК «La мора». Гэты канцэрт быў адным з апошніх на гэтай пляцоўцы, неўзабаве хаціну зьнясуць.

Пра сэнс сваёй творчасьці аўтар альбому «Зьнянацку» кажа так: «Кожны выступ — гэта як вынік пэўнага пражытага этапу жыцьця, хаця падчас канцэрту гэта адбываецца даволі спантанна і музыка нараджаецца ў рэжыме тут і цяпер“. Мне падаецца, што такі рэжым дазваляе стварыць такую дзіўнаватую музыку, якой можа не хапае ў нашай прасторы».

У аздабленьні альбому Віктар скарыстаў фотаздымкі Сяргея Гудзіліна, якія лічыць узорам стыхійнага менскага супрэматызму.

Альбом «Зьнянацку» стаў шостым афіцыйна выдадзеным на лэйбле і 108-м агулам (паводле прыблізных падлікаў) у дыскаграфіі Сямашкі, які запісвае сваю музыку яшчэ з пачатку 90-х гадоў. Такім чынам, Віцю можна лічыць рэкардсмэнам па колькасьці рэлізаў у беларускай музыцы. Дагэтуль меркавалася, што найбольш альбомаў запісаў гурт The UNB, на іх рахунку 107 рэлізаў.

Tuzin.fm

Цалкам спампаваць альбом «Зьнянацку» можна на старонцы лэйбла Haze

за тры месяцы
за тры месяцы